Afghanistan chungchangah all party meeting nei

Afghanistan ramchhung dinhmun leh, sorkar laipuiin hma lak dan chungchangte sawihoin nimin khan Delhi-a Parliament House Annexe-ah all-party meeting neih a ni.

Meeting-ah hian external affairs minister S Jaishankar chuan eptu hruaitute hnenah Afghanistan ram chhung dinhmunte leh, India mite hruaichhuah an nih dante a hrilh. Sorkar chuan India mi la tangkhang mekte hruaichhuah vek a tum thu pawh a sawi.

Jaishankhar chuan Afghanistan ram dinhmun chu a la ṭha lo hle a ni tiin, Taliban-te chuan Dohan-a inremna an ziaha an thutiamte chu an vawng zui lo a ni, a ti. Mi 15,000 velin sorkar laipui hnenah Afghanistan an chhuahsan theihna tura puihna an dil thu sawiin, dinhmun khirh leh hautak tak karah theihtawp chhuahin hruai chhuah hna hi thawh mek a ni tih a sawi bawk. Mahse India hi Kabul aṭangin ni khatah flight pahnih chauh a neih phalsak a ni a, India mi 300 chuang bakah, ram dang mi eng emaw zat chu India ramah hruai thlen an ni tawh.

All party meeting-ah hian Congres hruaitu Mallikarjun Kharge (rajya Sabha-a leader of opposition) leh Andhir Ranjan Chowdhury ( Lok Sabha-a party chief) bakah NCP hotu Sharad Pawar, DMK hruaitu TR Baalu leh prime minister hlui Deve Gowda-te pawh an tel. Afghanistan rama Indian ambassador Rudrendra Tandon leh foreign secretary Harsh Shringla te pawh an tel a ni.