Damdawi-in khum 50 awmna chinah oxygen plant siam zel rawt
Sorkar laipui hnuaia committee, India ram chhung hospital-a minimum standard kalpuina tur buaipuitu chuan ram chhunga private hospital, khum 50 chin awmnaah chuan mini oxygen plant pakhat tal dah zel turin a rawt.
National Council for Clinical Establishments hnena committee-in rawtna a thehluhah hian hospital tinah khum awm zat hmun thuma ṭhena hmun khat chu oxygen-supported bed-a siam turin an ngen bawk. India rama private hospital-te dan hman tura siam, The Central Clinical Establishment Act, 2011 hi tun thleng hian state 11 leh UT paruk chuan an hmang ṭan tawh a, state ṭhenkhat erawh chuan anmahni pualin dan hi an her rem ve bawk a ni.
NCCE sub-committee chuan an thil tum ber chu damdawi-in tinin oxygen daihkhawp an neih theihna atana hmalak a nih thu an sawi. Khum awm zat hmun thum ṭhena hmun khat chu oxygen bed an ni tur a ni a, oxygen chu a tlem berah darkar 48, duhthusam chuan darkar 72 daih khawp chu back up englai pawhin an nei bawk tur an ni, a ti.
Mini oxygen plant hi damdawi-in siam thar tan chuan neih vek tura tih ni se, hemi rual hian damdawi-in lo ding tawh sa tan chuan hemi siamna atan hian thla ruk aṭanga kum khat hun pek ni se tiin rawtna an siamah hian an tarlang.
India ramin Covid-19 hri leng thawh thihna a tuar vanglai khan, hmun hrang hrangah dam lo enkawlna tur oxygen indaih tawk lohna a nasa hle. Ram tam takin oxygen concentrator-te an rawn pe a ni. "April-May inkar chhunga harsatna nasa tak kan tawh aṭang khan, hripui eng ang pawh lo thleng se state tinten oxygen supply duhkhawp kan neih ṭul zia an ngaih pawimawh phah a ngai a ni, " tiin NCCE member Mira Shiva chuan a sawi.
National council chuan online health aggregator-te pawh huam tel an ngaih thu leh, kaihruaina dan mumal tak siamsak an ngaih thu a sawi bawk. Online lab service aggregator leh service provider-te chuan registration number an nei tur a ni, a ti bawk.
Health ministry chuan state hnenah lehkha thawnin an kutah mawhphurna an hlan tih an sawi. Online service provider-te registered clinical establishment zawmpui an nei ngei tur a ni tih a ni bawk.