Kum 12-17 inkar tan October thla aṭangin Zydus Cadila vaccine semchhuak ṭan dawn

Sorkar laipuia Covid panel hotu, Dr NK Arora chuan kumin October thla aṭangin kum 12-17 inkarte tan Zydus Cadila vaccine chu semchhuah ṭan a ni dawn tih a sawi. Hemi rual hian semchhuah a nih hmain hriattur pawimawh leh chanchin kimchang chu puanchhuah a ni ang, a ti.

National Technical Advisory Group on Immunisation (NTAGI) chairman Dr Arora chuan vaccine pek chhuah hna kalpui mekah, naupang kum 12-17 inkar, natna benvawn neite dah pawimawh an nih theih dan tur pawh ruahmanna siam an tum a, meeting an nei thuai dawn tih a sawi bawk.

Dr Arora chuan India ramah kum 12-17 inkar hi vaibelchhe 12 vel awmin, an zinga 1% aia tlem chu natna benvawn nei a ni, a ti.

Arora chuan school-te pawh hawn leh tawh rawtin, sero survey hnu­hnung berah naupangte hian Covid hri an la na lutuk lo tih pawh a hriat a ni tiin a sawi. "Naupangte chuan school an kal thei tawh a ni. Vaccine an lak ve kher a ngai lo. Mahse an himna tur in an nu leh pa, school staff-te chuan vaccine an lak a pawimawh thung," a ti.

Zydus Cadila siam ZyCoV-D hi August 20 khan Drug Controller General of India chuan emergency atana hman turin a phalsak tawh a ni. He vaccine hi dose thuma lak tur a ni a, DNA vaccine niin PharmaJet applicator hmanga pek a ni ang.