India ramah Covid-19 kai thar 44,658 an awm : Puitling 50% in vaccine dose khatna la tawh

India chuan Ningani khan mel lung pawimawh tak siam lehin, Covid vaccine la thei puitling zinga 50% chuan dose khatna an la tling ta.

Hemi ni vek hian ram chhungah Covid-19 kai thar 44,658 an awm leh a, hri vanga thi 496 an awm belh bawk.

Kerala chu hri kai thar tamna ber an ni leh a, hri kai thar 30,077 awmin, state chhunga hri kai tawh zat chu 39,13,506 an ni. Chhimlam state hian ramchhungah coronavirus kai thar an ngah ber a, hri kai hmuhchhuah tawh ngah ber dawttu an ni bawk.

Kerala hian hri kai zat chawhrual, positivity ratio (19.3%) nei mah se state chhunga hri kai 90% te chu natna lang chhuak lo leh hri tuar na lo an ni tih Kerala Covid expert-te chuan an sawi. Hri kai tam zawk hi mahni inah khunghran an ni a, hri kai tam tak awm mah se state chhunga damlo enkawlna chuan buaina lian tham an tawk lo niin an sawi. India rama hri leng tuar na ber Maharashtra chuan hri kai thar 5,108 leh thihpui 145 an nei.

Delhi chuan Ningani khan hri kaihhnawiha vanga thi an nei lo a, hri kai thar 45 an awm a, hri kai tawh aṭanga hri kai mek zat, positivity rate chu 0.06% ani tawh tih health department chuan a tarlang. Hri leng thawh hnihna chhunga nikhata hri vanga thi an awm loh ṭum 16-na a ni.

Ram pumah nitina hri kai thar zat, daily positivity rate chu 2.10% ni mekin, ni 28 chhung 3% hnuai lamah a awm tawh. Hri kai hmuhchhuah tawh aṭanga hri kai mek chu 1.06% niin, March 2020 hnua a hniam ber ṭum a ni bawk. Covid-19 kai dama chhuahtir tawh zat chu 97.60% an ni tawh bawk.

Covid-19 vaccine dose vaibelchhe 61 chuang semchhuah a ni tawh a ni. Ningani khan vaccine dose nuai 68 dawn semchhuah leh niin, January 16 aṭangin vaccination drive ṭum 223 an kalpuina chiah a ni. Union health minister Mansukh Mandaviya chuan Ningani khan puitling vaccine la thei chin zinga 50% te chuan dose khatna an la tawh tih a sawi.

Delta variant sub-lineage AY.12 chu state eng emaw zatah hmuhchhuah ni tawhin, kai zat erawh zirchianna thuk zawk neih a ngai dawn tih genome sequencing consortium INSACOG chuan a sawi. INSACOG chuan Delta leh AY.12 te hnathawh danglamna an hmu rih lo tih sawiin, an pahnih hian molecular level-ah pawh an inang hle niin an sawi.

India rama vaccine hman tlanglawn Covishield dose lak inkar hlat lam, ni 84 china bithliah chu tihtawi tumna a awm lo tih expert Dr NK Arora chuan a sawi. Indian Association of Preventive and Social Medicine chuan dose khatna leh dose hnihna lak hun chhung tihtawi hi an rawt a ni.

Khawvel huapin coronavirus kai mi maktaduai 200 chuang an awm tawh. Khawvel ram zinga hmun thum a ṭhena hmun khatte chuan an rama cheng 50% te chu vaccine dose khatna pawh an la pe thei lo a ni.