State chhunga zirtirtute'n vaccine dose bikimin la vek tawh : Mamata Banerjee

Union health minister Mansukh Mandaviya-an ram chhunga zirtirtu tan bik vaccine dose vaibelchhe hnih semchhuah turin peih a ni tep tawh tih a sawi tukah, West Bengal chief minister Mamata Banerjee chuan an state chhunga zirtirtute chuan vaccine dose bikimin an la vek tawh tih Ningani khan a sawi.

Health department official-te nena meeting an neihnaah Banerjee chuan hri leng thawh thumna thleng thei lo hmachhawn tur pawhin an inpeih tawh tih a sawi a, naupang kum 12 leh a hnuailam nei nu leh pate chu vaccine lak ngai pawimawh turin a chah.

"Hri leng thawh thumna lo thleng thei laka lo inbuatsaih lawk nan khum 10,000 pawh buatsaih fel a ni tawh. Zirtirtu 100% te chuan vaccine an la kim tawh bawk," tiin health changtu ni bawk Banerjee chuan a sawi.

Union health minister Mansukh Mandaviya chuan Nilaini khan Covid vaccine dose vaibelchhe hnih September 5, Teachers' Day thlen hmaa zirtirtu zawng zawngte vaccine pek kim hman an nih theihna turin state hrang hrangah semchhuah a ni dawn tih a sawi a ni.

Bengal CM chuan hri dona kawnga healthcare worker-te inpekna leh thawhrimna chu fakin, a kaihhruai sorkar chuan doctor leh nurse-te puala housing complex sakna turin ram acre 10-a zau a pe dawn tih a sawi. Hei bakah hian sorkar enkawl, SSKM hospital-a doctor leh nurse te tan Kolkata-a Lee Road-ah hostel siam a nih tur thu a sawi bawk.