Delhi khawpuiah CCTV dah hnem ber

India ram khawpui Delhi chu camera hmanga enthlithlaina closed-circuit television (CCTV) tamna ber khawpui a ni. Delhi khawpui hian US-a New York, China khawpui Shanghai leh UK khawpui London-te a khum a ni.

Khawvela khawpui lian 150-te zirchianna neiin Forbes India chuan list hi a tichhuak a ni. Delhi hi public place-a CCTV camera dah tam ber niin, mel khat bial chhungah CCTV hi 1,826.6 zel dah ang a ni. London chu mel khat bialah CCTV 1138.5 zel dah ang niin, Delhi dawtah a awm.

Delhi chief minister Arvind Kejriwal chuan khawpui chhung hmun hrang hrangte uluk taka thlithlai reng a nih theihna tura thawktu officer leh engineer-te chungah lawmthu a sawi a, hun rei lote chhungin an hna hi an thawk zo thei a ni, ati.

Chennai khawpui chu list-ah hian a lang ve bawk. Chennai hian mel khat bialah camera 609.9 an dah a, pathumna an ni.