BJP sorkar hnuaiah bank-a inbumna Rs vbch 54,000 hu a thleng : Congress

Congress Party chuan BJP in sorkarna a chan hnuah bank-ah inbumna cheng vaibelchhe 53,317 hu a thleng tawh niin a sawi a, hetihlai hian Prime Minister Narendra Modi chuan bank-a thil dik lo thleng chungchangah hian a la ngawi reng a, engtikah nge a ṭawngchhuah ve dawn tih an zawt nghal bawk. Congress party communications in-charge Randeep Surjewala chuan, "Modi-a kaihhruai sorkar hnuaiah chuan tlanchhiat leh tlanbo chu an kalphung thar a ni. Nitinin inbumna, bank root, intihderna, mipui leh bank bum a nih dan chungchang haichhuah a ni ta reng mai a ni", a ti.

Surjewala chuan February 9-a RTI hmanga zawhna chhannaah, BJP sorkar sorkar hnuaiah Mumbai khawpui bikah pawh kum thum chhungin bank-a inbumna leh thil dik lo tihna, cheng vaibelchhe 19,317 hu report a nih thu a sawi. RTI chhannaa a lan danin kum 2015 khan bank-a inbumna cheng vaibelcheh 5,580.66 report a ni a, kum 2016-ah Rs vbch 4,273.87 leh kum 2017-ah Rs vbch 9,838.66 hu a thleng a ni. Surjewala chuan thil mak ta chu hetianga thil dik lo tihna haichhuah a nih hnua mawhphurtua puh zinga mi 184-te chu an bibo thei niin a sawi.

Mi bumtu leh thil dik lotute ram pawn lama an tlanchhiat dante chu BJP sorkar chuan mipuite a hrilh a hun tawh a ni tiin Congress hruaitu chuan a sawi.