Sorkar laipuia TDP minister pahnih bang dawn

Central-a National Democratic Alliance (NDA) sorkar hnuaia BJP thawhpui, Telugu Desam Party (TDP) hotu, Andhra Pradesh Chief Minister N Chandrababu Naidu chuan sorkar laipuiin an state tana special status a pek duh loh vangin an party minister-te chu Union Cabinet aṭanga bang turin a ti.

CM Naidu-an union cabinet-a an party minister-te bang tura a tih vang hian, Andhra Pradesh-a BJP minister pahnih, Kamineni Srinivas leh Paidikondala Manikyala Rao-te chuan ban an tum thu an sawi ve bawk. Nimin zing khan Andhra CM hian cabinet meeting a ko a, hetah hian BJP minister pahnihte hi an tel duh lo a ni.

Andhra Pradesh-a BJP hruaitu, Krishna Sagar Rao chuan Naidu-an sorkar laipuiin Andhra Pradesh a ngaihsak lo leh thlawp lo anga a sawi chu thu dik lo niin a sawi a, Naidu thiltih dan chu politics lama hamṭhatna lak tumna niin a puh.

TDP hotu leh AP CM Naidu hian Nilaini khan central-a TDP minister pahnih–P Ashok Gajapathi Raju (Civil Aviation) leh YS Chowdary (Minister of State for Science and Technology)-ten banna an thehluh tur thu hi a sawi a ni. TDP hi NDA hnuaia party thawkho zingah BJP dawta party lian ber a ni. Lok Sabha-ah member 16 neiin, Rajya Sabha-ah member pahnih a nei a ni. Kum li dawn BJP an thawhpui hnuah an thawhpuina hi an titawp dawn ta a ni.

Naidu-an an party minister-te an ban tur thu a puan hma hian, Union Finance Minister Arun Jaitley-a chuan Andhra Pradesh hnena special status pek chu thil theih a nih loh thu a sawi a, hemi rual hian Andhra Pradesh pui tur chuan sorkar laipuiin theihtawp a chhuah zel tur thu a sawi.

Andhra Pradesh hi state pahnih–Andhra Pradesh leh Telangana-a ṭhen a nih dawn khan hetihlaia central-a sorkarna changtu, UPA chuan AP hi special status pek a lo tiam a, hei hi state chhunga party hrang hrangte chuan tihlawhtling turin sorkar laipui an nawr zui reng a ni. AP-a rorellai, TDP bakah eptu party, YSR Congress party hruaitute chuan special status pek phutin nawrh pawh an lo huaihawt tawh a ni. State chhung hmun hrang hrangah pawh nawrh huaihawt a ni fo bawk. Naidu chuan BJP nena thawhdunna thuthlung an siam dawn khan BJP chuan AP tana special caterogy status an phut pawh a thlawp thute a hrilh a, mahse tunah chuan ro hran a rel leh ta a ni, a ti. TDP chuan thuneihna ringawt a atchilh lo a, an laka thu lo tiamte zahsak an phut thu sawiin, tunah chuan NDA sorkara tel ve zelna chhan tur a awm lo niin a sawi.