Nirav Modi lakah CBI-in thubuai siam belh leh

Central Bureau of Investigation (CBI) chuan Punjab National Bank (PNB) a sum tam tham tak tihchingpen chungchanga buaina thleng meka mawhphurtua puh, lunghlua sumdawng lian Nirav Modi-a chu kum 2013-2017 chhunga PNB-in cheng vaibelchhe 321 a hloh phahna chhana puhin thubuai a siamsak belh leh.

CBI chuan PNB aṭanga complaint an dawn thar leh avangin thubuai hi siam thar leh a nih thu a sawi. Complaint thehluhah hian Nirav Modi-a Firestar Diamonds International Ltd. finance president hlui Vipul Ambani, chief finance officer Ravi Gupta leh company director leh official-te bakah, bank-a thawk ṭhenkhatte hming pawh ziahlan a nih thu an sawi. CBI hian a hmain PNB sum tihchingpen kaihhnawihah Modi-a lakah hian thubuai a lo ziaklut tawh a ni.

CBI hian PNB buaina kaihhnawihah hian mi 19 an man tawh a, hetihlai hian he buaina thleng chhuitu dang Enforcement Directorate (ED) chuan Nirav Modi leh Mehul Choksi-a kaihhnawih in leh hmun dang 198 dap tawhin, an thil neih cheng vaibelchhe 6,000 dawn hu pawh an hreksak tawh bawk.