Loan ngaihdam phutin loneituten kawng an zawh

Maharashtra-a loneitu 30,000 chuangin an loan ba ngaihdam sak tura state sorkar phutin Nashik aṭangin Mumbai panin kawng an zawh a, Pathianni-ah Mumbai an thleng ang.

Loneitute hi state sorkar agricultural policy siamah an lungawi lo a, an loan ba-te ngaidam tura an phut bakah, an ram lakluih sak a nih ṭhin tihtawp te, electric bill ngaihdam te pawh an phut tel a ni.

Loneitute hian Thawhlehni khan Nashik aṭanga chhuakin, Mumbai-Agra National Highway-a km 180-a thui kawng an zawh a ni. Nimin khan All India Kisan Sabha National President Ashok Davle-a kaihhruaiin Thane an thleng tawh bawk. Davle chuan nikum June thlaa BJP kaihhruai state sorkarin loneitute loan ba, cheng vaibelchhe 34,000 ngaihdam a nih tur thu a puan chu a taka tihhlawhtlin a la ni lo tih sawiin, loneitu 1,753 in an intihhlum phah tawh niin a sawi.

BJP sorkar chu loneitute phatsan a, an laka thutiamte tihpuitling lohah Davle chuan a puh. Rial tla leh rannung puangin an thlai tam tak a tihchhiatsak loneitute zangnadawmna pe turin a phut a, thlai chinna tur ram dang pe turin a phut bawk.