Mumbai bula Pharmaceutical Company chemical Plant a kang

Mumbai bul, Boisar-a pharmaceutical company chemical plant chu Ningani zan khan puakin nasa takin a kang zui. Kangmei chhuak vang hian mi pathum an thi a, mi dang 15 in hliam an tuar.

Report-a a landanin, zan dar 11.15 vel khan Boisar MIDC-a Novephene Specialities plant-a solvent litre 200 vel awmna bawm 25-te chu an puak a ni. Kangmei chhuak ṭhelh tura kangṭhelhtu kalte chuan factory bulah ruang pathum hi an va hmu a, hliam tuarte hi hospital hrang hrangah dah an ni. Hliam tuar zinga ṭhenkhat chu an dinhmun a ṭhat vak loh avangin thi zat pawh an la punchhoh rin a ni.

Palghar district collector Prashant Narnaware chuan plant aṭang hian thil puak ri ṭum 40 zet hriat a nih thu a sawi a, kangṭhelh leh chhanchhuah hna thawk turin police, kangṭhelhtu leh damdawi lam mite an kal nghal niin a sawi. Plant puakin lei a nghawr nghin hi km 12 vela hla Palghar, Mahim, Boisar leh a chhehvelah pawh an hre thei a ni.

Nanaware chuan kangmei chhuahna hmunah hian safety rules siam an zawm lo niin a sawi a, he chhiatna thlenga mawhphurtute chu chhui mek niin, thubuai pawh siamsak an ni dawn tih a sawi. Kangmei chhuak hian a bula chemical unit pali - Prachi Industries (manufacturing iodine), Bharat Rasayan, Arti Industries (manufacturing vitamins), Unimax leh a dangte pawh a tichhe tel a ni.