Loneitu kawngzawhten Mumbai an thleng

Maharashtra-a loan ba ngaihdam phuta nawrh huaihawt, loneitute 30,000 rualte chuan nimin khan Mumbai an thleng. Vawiin hian Assembly House kawtah an thil phut tihhlawhtlin phutin an pungkhawm dawn.

Kawngzawh hi Communist Party of India (Marxist)-a loneitu pawl, All India Kisan Sabha (AIKS) huaihawta neih a ni a, kar kalta Thawhlehni khan Nashik aṭangin kawng an zawh ṭan a ni. Nashik-a kawngzawh ṭannaah hian loneitu 12,000 vel an tel a, km 180-a thui zawhin kawng lakah thlawptu an neih bel zel a, mi 30,000 an chuang tawh a ni. Loneitute hian thil hrang hrang an phut a, an thil phut pui ber chu an loan ba ngaihdam a ni.

AIKS general secretary Ajit Nawale chuan an state-a loneitute chuan harsatna nasa tak tawkin, sum lamah pawh an buai hle tih a sawi. Loneitute harsatna chhawk tum hian state sorkar chuan eng thil mah a ti lo nia sawiin, hei vang hian nawrh huaihawt mai loh chu thlan tur dang an nei tawh lo a ni, a ti. Assembly House kawta an punkhawm hunah chuan mi 60,000 vel an tlin a rin thu a sawi bawk.

Loneitute thil phut zingah hian an loan ba ngaihdam bakah, rial tla leh rannun puangin an thla a tihchhiatsak avanga zangnadawmna pek te, loneitute hnenah thlai chinna tur ram pek te, Forest Rights Act a taka hmante a tel.