Dhinakaran-an a party thar tlangzarh dawn

AIADMK hruaitu aṭanga ban, TTV Dhinakaran-a chuan March 15 hian a political party din thar a tlangzarh dawn.

Dhinakaran-a hi AIADMK hruaitu hlui, tuna jail-a tang mek VK Sasikala-i vahpa niin, tun hnaia Jayalalithaa-i bial hlui, Chennai-a RK Nagar-a by-election neihah khan a chak a ni.

March 15 hian Dhinakaran chuan Madurai-ah a party thar hming leh flag hi a tlangzarh dawn a ni.

AIADMK hotu leh Tamil Nadu chief minister hlui Jayalalithaa-i a thih hnuin AIADMK hi an phir zui a, party symbol hmangtu zawk nih inchuhin an buai hle. Mahse Election Commission chuan RK Nagar by-election neih turah pawh khan AIADMK pawl pahnihte hi an party symbol hman a phalsak lo ve ve a ni.

Jaya-i a thih hnua amah thlaktu tura ruat, VK Sasikala-i chu eiruk thubuaiah man niin jail-ah tantir a ni a, jail-a dah a nih hmain Sasikala-i hi a vahpa, Dhinakaran-a party ah chanvo pawimawh tak a chelh tir a ni. Mahse a tan hnu hian AIADMK chuan Dhinakaran leh Sasikala-te hi party-a an nihnate a hlihsak bakah, an party aṭangin an hnawtchhuak zui a ni.