India-ah Covid-19 vangin mi 7,200 an thi tawh China aiin Maharashtra-ah kai an tam tawh zawk

Ram chhunga coronavirus hri lengin ziaawm lam a la pan thei lo zel a, nimin pawh kha kai hmuh chhuah thar tam ber ni ni lehin, hri kai hmuh chhuah thar 9,983 an awm.

India ramah Covid-19 kai mi 2,56,611 an awm ta a, khawvel ram hrang hrang zinga hri kai tam parukna ni mekin enkawl dam 1,24,430 an awm tawh a, hri kai mek 1,24,981 an awm a ni.

Covid-19 vanga thi mi 7,200 an awm tawh a, nimina Ministry of Health and Family Welfare report tihchhuah hma darkar 24 chhungin mi 271 an thi leh a, enkawl dam 5,137 an awm thung.

India ramah chuan ni ruk chhung a zawnin kai hmuh chhuah tam ber ni a thleng ta a, tun ang renga hri kai hmuh chhuah zat a pung chak a nih chuan kar loah ni khata hmuh chhuah zat hi sing a chuang thuai dawn niin a lang. 

India rama hri kai tam berna state Maharsahtra-ah chuan hri kai 85,975 an awm tawh a, darkar 24 chhungin case thar 3,007 a awm belh.

Hri kai enkawl dam 39,314 an awm laiin hri kai mek 43,601 an la awm thung a, darkar 24 chhungin enkawl dam 1,924 an awm tawh bawk. Covid-19 vanga thi 3,060 awm tawhin mi 91 an thi leh a ni.

Hri leng inṭanna China-ah chuan Covid-19  kai, confirm case hi  83,040 an awm a, thihpui 4,634 an awm. Hri kai zatah hian Maharashtra chuan China hi a pel ta a, thihpui erawh China-ah hian an la tam zawk thung. 

Maharashtra state-a hri kai zinga 57% dawn chu state khawpui, Mumbai-a mi an ni. Mumbai-a hri kai hmuh tawh hi 48,774 an tling tawh a, Thane-in dawtin hri kai 13,014 hmuh an ni tawh bawk. India ram puma Covid-19 vanga thi zinga 43% dawn chu Maharashtra-a mi an ni bawk a ni.  

Maharashtra-a hri kai awm zat ringawt hi ram tam taka ram pum case aiin a tam tawh zawk a ni. China hi hri kai tam ram 18-na a ni tawh a, case hmuh belh an awm tawh ngai mang lo a ni.