Covid-19 kai thar 45,083 awm belh leh : Hri kai thar 3.5% in tlahniam

India ramah Inrinni khan Covid-19 hri kai thar 45,083 an awm belh leh a, Zirtawpnia hri kai 46,759 aiin an tlem zawk a, hri kai hi vaibelchhe 3.26 chuang an awm tawh a ni.

Hri vanga thi 460 awm belh bawkin, hri vanga thi tawh zat chu nuai 4.37 chuang an ni. India ramah hri kai mek, active case chu 3,68,558 ah an tlahniam leh a. Inrinni khan dama chhuahtir 35,840 an awm leh a, hri kai dama puan vaibelchhe 3.18 chuang an awm tawh.

Dama puan, recovery rate hi 97.53% ni mekin, thla liamta chhung khan an sang chho hle a ni. Nitina hri kai thar, daily positivity rate chu 2.57% ni mekin, ni 34 chhung 3% hnuai lamah a awm tawh. World Health Organisation (WHO) chuan Covid positivity rate 5% hnuailama awm te chu hmun him, safe zone-ah a puang a ni.

Kerala-ah chuan ni li chhung hri kai thar 30,000 chuang an awm ziah a, Inrinni khan Covid kai thar 31,265 an nei leh. Chief minister Pinarayi Vijayan chuan sorkar tum ber chu hripui len chhunga mihring nunna a tam thei ang ber chhanhim a nih thu sawiin, state chhungah hri vanga thi, case fatality rate chu ram pum huap aiin a hniam zawk tih a sawi.

Delhi khawpuiah Inrinni khan hri kai thar 61 awmin, hri vanga thi an awm lo a, khawpuiah hian hri leng hi an khuahkhirh ṭha tawh hle. Deputy chief minister Manish Sisodia chuan September 1 aṭangin khawpui chhunga school-te chu hawn ṭan an ni leh dawn a, class 9-12 zirlaite chuan an nu leh pate phalna lain school an kai thei dawn tih a sawi a, hybrid system hmangin zirlaite chu school kal turin nawrluih an nih loh tur thu a sawi bawk.

Ram pumah vaccine dose nuai 73.8 chuang semchhuah belh leh niin, vaccine semchhuah tawh hi dose vaibelchhe 63.09 chuang a ni tawh tih health ministry chuan a sawi.

The Lancet journal-in zirchianna an kalpuina aṭanga a lan danin Covid-19 kai damdawi-ina dah ngai khawpa la nate chuan hri an kai ṭan aṭanga thla 12-na thleng an taksaah harsatna lian tham vak lo alang chhuak niin an sawi. Hri kai tawh hmun thuma ṭhena hmun khat chuan thla 12 vel thleng an thawk lamah harsatna an nei tih an tarlang.

Kar liamta Ningani khan United States-ah coronavirus kai damdawi-ina dahluh ngai nuai khat chuang an awm a, thla riat hnua an tam ber ṭum a ni. Hri inkaichhawn awlsam tak Delta variant chuan US hi a tibuai leh mek a ni. Thla liamta chhungin US-a Covid kai, damdawi-ina dah ngai khawpa na chu a letin an pung tawh a ni.