Delhi sorkar thutlukna siamah inrawlh turin sorkar laipui ngen
Uttar Pradesh chief minister hlui leh Bahujan Samaj Party (BSP) hotu, Mayawati chuan Delhi sorkarin Delhi-a cheng lote khawpui chhung damdawi-ina enkawl a rem tih loh chungchangah sorkar laipui inrawlh turin a ngen.
Pathianni khan Delhi chief minister Arvind Kejriwal chuan sorkar laipui damdawi-in tih loh zawng, Delhi-a sorkar leh private ṭhenkhat damdawi-inte chu Delhi-a chengte tana hauhsak (reserved) an nih thu a sawi a, Covid-19 hri leng vangin Delhi-a damdawi-ina mutna tur khum chungchangah indaih lohna a awm hlauhthawn thilah heng hmalaknate hi neih a nih thu a sawi bawk.
Kejriwal-a hmalaknate hi Mayawati chuan na taka sawiselin, "Delhi hi India mi zawng zawngte tana khawpui a ni a, he khuaah hian hna pawimawh thawkin an awm ṭhin bawk. Lo dam lo thut ta se Delhi sorkarin state dang
aṭanga hnathawkte hi damdawi-inah enkawl a phal dawn lo tihna a ni," tiin a sawi.
Mayawati hian vawiin aṭanga Unlock-1 a inthlahdulna ṭhenkhat hman chungchangah a ngaihdan a sawi chhuak bawk a, sorkar chuan bazar hmunpui leh hmun danga mite kal a phal thu sawiin, hri leng hian ziaawm lam a pan mai loh avangin, a pawimawh tawp a nih loh chuan chhuah mai mai loh tur a ni tiin mipuite a ngen thu a sawi bawk.