HP-ah puitling 100% in Covid-19 vaccine dose khatna la tawh

Himachal Pradesh sorkar chuan state chhunga puitling Covid-19 vaccine la thei chin hnenah vaccine dose khatna an pechhuak kim tawh.

State health minister Dr. Rajiv Saizal chuan Inrinni khan he thu hi sawiin, Himachal Pradesh chu ramchhung state zinga kum 18 chin chunglam zawng zawng tana Covid-19 vaccine dose khatna pe kim thei hmasa ber an nih thu a sawi.

Saizal chuan, "Mipui kum 18 chunglam 100% tan vaccine dose khatna kan pechhuak tawh a, November 2021 hmain mipui 100% hnenah dose hnihna pekchhuah hman leh kan tum a ni," a ti. Prime minister Narendra Modi chuan Himachal Pradesh CM-in Covid-19 hri leng thunun tura hma a lak dan leh vaccine semchhuahna kawnga state sorkar hma lakna chu a fak hle a ni, a ti.

Health minister chuan state sorkarin special virtual event a buatsaih dawn a, hetah hian PM Modi chuan state health care worker leh beneficiary dangte pawh a kawm dawn tih a sawi bawk.

"2011 census aṭanga chhutin, kum 18 chunglam mi 47,00,681 te chuan vaccine an la tawh a ni. State sorkarin a chhut dan chuan kum 18 chin hi mi 53,770,820 angin a chhut a, mahse vaccine dose khatna hi mi 5,443,113 te hnenah pek an ni tawh," a ti.

Minister chuan mipui vaccine pek hmaih an awm palh a nih chuan chhuichhuah vat an ni dawn a, an zavaiin vaccine pek vek an ni dawn tih a sawi. Nimin thleng khan state chhunga mi nuai 13 in vaccine an la tawh tih minister chuan a tarlang.

Ram pumah hri kai thar 42,909 awm belh leh
Ram pumah Pathianni khan Covid-19 hri kai thar mi 42,909 an awm belh leh a, mi 380 chu hripui vangin an thi bawk.

Pathiannia hri kai hmuh chhuah thar zingah mi 29,836 hi Kerala state ami an ni a, an state-a hri kai hmuh chhuah tawh hi mi 40,07,408 an tling tawh. Kerala-ah hian hri leng hi a la hluar hle a, test positivity rate pawh 20% dawn a tling. Pathianni vek khan hri kai thi hi mi 75 awm belh lehin, an state-ah hian Covid-19 thihpui hi mi 20,541 an awm tawh a ni.

India ram puma hri kai mek, active case pawh an pung chho leh tawh a, mi 3,76,324 an awm. Hri kai hmuh chhuah tawh aṭangin 1.15% an ni. Hetih lai hian hri kai enkawl dam, recovery rate chu 97.51% a ni mek bawk.

Hri kai thar hi an pung chho leh deuh a, hri kai hmuh chhuah, daily positive rate pawh 3.02% ah kaiin, ni 35 hnuah 3% a tlin lehna hmasa ber a ni. Weekly positivity rate chu 2.41% niin, ni 66 chhung chu 3% hnuai lamah a awm tawh a ni.