September 1 aṭangin SC-in physical hearing nei ṭan dawn

Supreme Court chuan thla 17 chhung physical hearing case an neih theih tawh loh hnuah September 1 aṭangin thubuai pawimawh bikte chu physical hearing an neihpui thei tawh dawn tih a sawi.

SC-in a tarlan danin, thubuai ngaihtuah rei ngai bikte chu Thawhlehni, Nilaini leh Ningani-ah te physical hearing neih ṭhin an ni ang. Mahse Thawhṭanni leh Zirtawpni-ahte chuan virtual hearing neih chhunzawm a ni thung ang.

Covid-19 hripui leng vangin SC hian thubuaite chu hun rei tak virtual hearing hmangin a ngaihtuah ṭhin a, mahse court chhungah ngei ngaihtuah a, physical hearing kalpui tawh tur hian Supreme Court Bar Association (SCBA) leh Supreme Court Advocate on Record Bar Association (SCAORA) chuan Chief Justice N V Ramana hnenah an ngen a ni. SCAORA office bearer-te nena meeting an neihnaah, Chief Justice chuan karleh aṭangin hybrid hearing virtual leh physical inkawpin kalpui ṭan a ni thei tawn dawn tih a hrilh a ni.

Kumin March thla tir khan lawyer-te phutna avangin Supreme Court chuan hybrid hearing hi a kalpui ṭan a, mahse ram chhungah hri leng thawh hnihna thleng leh avangin an chhunzawm leh thei ta lo a ni.

Hripui leng vangin Supreme Court hian nikum March thla aṭang khan thubuaite hi video-conferencing hmang zelin a ngaihtuah a, mahse virtual hlang hmanga hun rei tak kalpui tawh chu titawp a, physical hearing kalpui thuai hi bar body leh lawyer hrang hrangte chuan an duh tawh a ni.

July thla khan SCBA chaun CJI hnenah lehkha thawnin, India ram khawpui Delhi-a hri leng dinhmun a ziaawm tawh avang leh, boruak pawh a pangngai chhoh ṭan tawh avangin physical hearing hi kalpui tawh turin an ngen bawk.