Railway union member-ten kawng an zawh

Indian Railways hnuaia thawkte awmna, railways union hrang hrang member 50,000 velin nimin khan Delhi-a Parliament building panin kawng an zawh. Union-te hian National Pension System (NPS) sut tur leh an hlawh tisang turin sorkar an phut a ni.

Railway union-te hian minimum pay Rs 18,000 chu Rs 26,000 a tihpun an phut. NPS chu sut an duh thu sawiin, NPS hnuaiah hian kum 2004 leh a hnu lama sorkar hnaa lutte chuan minimum pension emaw, family pension emaw an nei thei tawh lo a, mahse hetichuang hian he scheme atan hian thla tinin an thla hlawh aṭanga 10% an pe reng tho niin All India Railwaymen's Federation (AIRF) general secretary Shiv Gopal Mishra chuan a sawi.

Delhi-a lungawi lohna kawngzawha tel tur hian ramchhung hmun hrang hranga Railway hnuai thawkte an tel a, mahse rel service erawh a bahlah phah lo a, a lo buaipuitu tur an dah niin an sawi.

Kum 2016 February thla khan AIRF chuan an member-te zingah an thil phut tihpuitlin a nih loha hma lak an duh dan chungchang a lo zawt tawh a ni. Thawktu zinga 95% chuan nawrh huaihawt hi an duh thu an sawi a, he ngaihdan hi Indian Railways zone 17 leh production unit pasarih-a thawktu zingah lak a ni.

NPS hlih hi hnathawktute hian an lo phut fo tawh a, nikum khan Union Home Minister Rajnath Singh kaihhruaiin minister pathum awmna committee din a ni. NPS chungchang hi sawiho ṭhin ni mah se, tun thlengin hmasawnna hmuh tur a la awm lo. Kum 1974 khan railway hnuaia thawkte chuan an hlawh tihsan phut hian ram pumah nawrh an huaihawt tawh a, kar thum dawn nawrh an huaihawt avangin mipui nunphung pawh a khaihlak nasa hle.