Maha loneituten an nawrh titawp : Sorkarin an thil phut ṭhenkhat pek a tiam

Maharashtra-a loneituten lungawi lohna lantira Nashik aṭanga Mumbai thleng kawng an zawh hnuah, Thawhṭanni khan Mumbai-a Assembly House kawtah nawrh an huaihawt zui. Mahse state sorkar chuan loneitute thil phut pakua zinga pahnih tihhlawhtlin nghal leh, a bak pawh lo enzui a tiam avanign Thawhṭanni zan khan nawrh hi an titawp a ni.

Thawhṭanni khan sorkar aiawh leh loneitute aiawh mi 15-te chuan darkar li chhung zet meeting neiin, loneitute thil phut hrang hrangte an sawiho a ni. Loneituten an thil phut zingah hian thu delhkilh awm loa an loan ba ngaihdam te, tribal mi ram nei lote hminga ram dahsak te, thlai thar man bithliahtu tur committee din leh rannung puangin thlai a tihchhiat sakte zangnadawmna pekte a tel. Rial tla leh rannung puang vang hian la chingtu mi nuai 35 zetin harsatna an tawk a ni.

Chief Minister Devendra Fadnavis chuan loneitu leh tribal-te thil phut tam zawk chu an remtihpui thu a sawi. An thil phut lian ber pakhat chu an hminga ram dah a ni tih sawiin hei hi tihsak an ni dawn a, hemi buaipuia thla ruk chhunga lo tifel ngei turin committee pawh an din tur thu a sawi.

Loneituten loan ba ngaihdam an phutna pawh kum 2008-a loan ba ngaihdamin a huam ve loh, kum 2001-2009 chhunga harsatna tawktu loneitute pawh huam tel tir vek an ni dawn niin CM chuan a sawi bawk.