Sawiho loin LS-ah Union Budget 2018 pass

Parliament Budget session neih mekah eptu party-te chu sorkar laipui policy leh ramchhunga thil thleng hrang hrang chungchangah lungawi lohna lantirin an aubuai chhunzawm zel a, hei vang hian April 1 aṭanga hman ṭan tur, Union Budget 2018-19 pawh nimin khan Lok Sabha-ah sawiho loin pass a ni.

Finance Minister Arun Jaitley chuan nimin khan Lok Sabha-ah Finance Bill 2018 a pu lut a, mahse bill chungchang hi sawiho theih loin eptute chuan an lungawi lohna hrang hrang an aupui a ni. Hei vang hian voice vote hmangin bill hi pass a ni ta a ni.

Rorellai BJP kaihhruai National Democratic Alliance (NDA) hian Parliament Lower House, Lok Sabha-ah hian majority a neih avangin bill pawh sawiho theih a ni lo chungin awlsam takin Finance Bill leh Appropriation Bill-te hi an pass a ni.

Lok Sabha-a bill pahnih pass-te hi Rajya Sabha-ah ngaihtuah a ni leh ang. Mahse hengte hi money bill an nih avangin, Parliament Upper House hian ni 14 chhunga a thawn kir leh lo a nih chuan a pawm angah ngaih a ni dawn a ni. Rajya Sabha-ah hian eptu lam member an tam zawk a ni.

March 5-a Parliament Budget session thawh hnihna neih a nih leh aṭang khan eptuten an lungawi lohna hrang hrang aupuia inkhawm an tihbuai avangin rorel mumal thei loin an la awm a ni. Session hi April 6 thleng neih a ni ang.