Eptu pawl 20 hruaitute Sonia Gandhi inah inhmu

15th March, 2018

United Progressive Alliance (UPA) chairperson Sonia Gandhi chuan Thawhlehni khan a chenna 10 Janpath, New Delhi-ah eptu pawl hruaitute tan zanriah a buatsaih a, he hunah hian eptu pawl hrang hrang 20-a hruaitute an tel.

Sonia Gandhi-i ina inhmukhawm, eptu pawl hruaitute hian kum 2019 Lok Sabha inthlanpui neih tura BJP beih let dan turte an sawiho a, BJP ep tur hian ṭangrual pawl lian tak a din mai theih rin a ni.

Congress hruaitu zanriah buatsaiha tel zingah hian National Congress Party hotu Sharad Pawar, Trinamool Congress hruaitu Sudip Bandyopadhyay, Rashtriya Janata Dal aṭangin Tejashwi Yadav leh a farnu Misa Bharti, National Conference hotu Omar Abdullah, DMK aṭangin Kanimozhi, Rashtriya Lok Dal president Ajit Singh leh Samajwadi Party hotu Ram Gopal Yadav te pawh an tel.

Bharatiya Tribal Party, Communist Party of India (Marxist), Communist Party of India, Jharkhand Mukti Morcha, All India United Democratic Front, Kerala Congress (Mani), Janata Dal (Secular), Revolutionary Socialist Party leh ndian Union Muslim League aiawhte pawh an tel. Meeting neih hmasaa tel lo, Bahujan Samaj party pawh an hruiatu hlun Satish Chandra Misra a tel tawh. Thawhlehni meeting-a hian a hmaa la tel ngai lo Hindustan Awami Morcha leh Jharkhand Vikas Morcha hotute pawh an tel thar a ni.

Congress aiawhin party president Rahul Gandhi, prime minister hlui Manmohan Singh, Rajya Sabha-a eptu hruaitu Ghulam Nabi Azad leh hruaitu hlun AK Antony, Ahmed Patel, Mallikarjun Kharge leh Randeep Singh Surjewala-te an tel bawk.

Congress thupuangtu Surjewala chuan he zanriah hi politics thil vanga buatsaih ni loin, eptu party-te inkarah inṭhianṭhatna a awm theihna tura buatsaih a nih thu a sawi. An tum ber chu politics lam thil ni lo mah se, ramchhunga harsatna leh buaina thleng mek chungchangte erawh chu chhungkua anga sawiho a ni, a ti.

CPI(M) hruaitu Mohammad Salim chuan eptute chuan meeting awmze nei zawk an la nei dawn niin a sawi a, Sharad Pawar pawhin eptu party-te meeting hi tun thla tawpa neih turin a ko bawk a ni.