Aadhaar thlunzawm hun tiam chin awm loin pawtsei

Supreme Court chuan bank account leh mobile phone-te Aadhaar card nena thlunzawm theih hun chu court-in thutlukna dang a siam hma chu tiam chin awm loin a pawtsei.

Sorkar laipui chuan bank account leh mobile number-te Aadhaar number nena thlunzawm tur hian March 31 thleng hun a bithliah a, mahse judge panga awmna, Chief Justice of India Dipak Misra kaihhruai Constitution bench chuan hei hi ngaihtuahin, a hun hi a pawtsei leh ta a ni.

Surpeme Court chuan sorkar laipui hian Aadhaar thlunzawm ngei ngei tur hian a ti lui thei lo ang tih a sawi a, mahse hemi rual hian social scheme hnuaia hamṭhatna dawng turte tan erawh chuan Aadhaar hi neih a ngai niin a sawi.

Nikum December 15 khan Supreme Court chuan service leh welfare scheme hrang hrangte Aadhaar nena thlunzawm hun tur hi kumin March 31 thleng atan a lo pawtsei tawh a ni.