Dhinakaran-an a party thar tlangzarh

AIADMK hruaitu hlui TTV Dhinakaran-a chuan nimin khan Madurai, Tamil Nadu-ah a political party thar a tlangzarh. Dhinakaran-a party thar hi Tamil Nadu chief minister hlui J Jayalalithaa-i hming chawiin, Amma Makkal Munetra Kazhagam tih a ni.

Party thar tlangzarh inkhawm buatsaihah hian Dhinarakan-a thlawptu mi tam tak an punghawm a, an tlangzarhna hmunah hian AIADMI hotu hlui–Jayalalithaa, MGR leh VK Sasikala-i te thlalak lian tak tak tar an ni. Party thar tlangzarhnaah hian party flag leh symbol pawh pholan nghal a ni a, an flag hi rawng chi thum, a dum, a sen leh a var inpawlh niin a laiah Jaya-i thlalak dah a ni bawk.

Tamil Nadu chief minister hlui Jayalalithaa-i a thih hnuah party hotu atana thlan, VK Sasikala-i duh loa hel an awm a, AIADMK hnuaiah hian pawl pahnih an awm zui a ni. Dhinakaran-a hi Sasikala-i vahpa a ni a, Sasikala-i hi eiruk thubuaia thiam loh chantirin jail-ah tantir a ni a, jail-a a luh hmain Dhinakaran-a hi party hotu pawimawh dinhmun a pe a ni. Mahse CM kaihhruai AIADMK chuan Sasikala-i leh Dhinarakan-te hi party hruaitu an nihna aṭangin a ban a, a hnuah party aṭangin an hnawtchhuak zui bawk.

AIADMK hnuaia pawl pahnih, Dhinakaran-a kaihhruai leh Chief Minister E Palaniswami kaihhruaite chuan party symbol, hnah lem pahnih awmna chu a changtu zawk nih an inchuh reng a ni. Jaya-i bial hlui, Chennai-a RK Nagar-a by-election neihah Dhinakaran hi thlan tlin a ni.