Congress leh TDP inhnialbuai vangin RS inkhawm titawp

Nimina Rajya Sabha rorel inkhawm chu UPA sorkar laia Andhra Pradesh state ṭhendarh a nih chungchangah Telugu Desam Party (TDP) member, union minister hlui YS Chowdary leh Congress member-te an inhnial buai a, chawhnu dar 2 thleng rorel inkhawm tihtawp a nih phah.

YS Chowdary leh TDP member dang Ashok Gajapathi Raju chu BJP kaihhruai sorkar laipuiin Andhra Pradesh chu special category status a pek duh loh avanga lungawi loin Union Cabinet aṭangin an bang a ni. TDP hi BJP kaihhruai NDA ṭangrual sorkarah tel mah se, BJP chuan an state duhsak loah puhin minister-te pawh an ban phah a ni. Nimina Rajya Sabha rorel inkhawm ṭan anih hian Chowdary chuan minister a nihna aṭanga a ban chhan a sawifiah a ni. Upper House inkaihhruaina Rule 241 chuan a banna chhan a sawifiahna Chairman hnena a lo thehluh tawh chu member hian House-ah a chhiar chhuak tur a ni tih a ni.

Mahse Chowdary hian a thuziak anga sawi loin United Progressive Alliance (UPA) chu Andhra Pradesh state ṭhendarh a, Telangana leh Andhra Pradesh state din a nihnaah hmanhmawh leh ruahmanna felfai lo taka thiltiah puhin a dem zui a ni. Hei hian Congress member-te a tilungawi lo a, Chairman podium-a Congress member chu chhuakin, Chowdary thusawi dana an lungawi loh thu an aupui a ni. Member-te hi an in auhbuai chhunzawm avangin Chairman M. Venkaiah Naidu chuan inkhawm a tihtawp phah a ni.