NDA atangin TDP a inhnukdawk

Andhra Pradesh-a rorellai, Telegu Desam Party (TDP) chu nimin khan BJP kaihhruai National Democratic Alliance (NDA) aṭangin a inhnukdawk.

TDP hian sorkar laipuiin Andhra Pradesh tana special category status a pek duh loh avangin kar hmasa khan NDA sorkara an party minister pahnihte chu a lo bantir tawh a, NDA erawh an la tel zui tur thu an sawi a ni. Mahse nimin khan NDA aṭanga an inhnuhdawh tur thu an sawi leh ta a ni.

TDP chuan NDA an thlawpna an hnuhdawh thu an puan hnuah, an state laka dik lo taka ro a rel avangn sorkar rin tawk lohna motion pawh putluh an tum thu an sawi. Nimin tlai khan party politburo meeting neih a ni a, he hunah hian NDA chhuahsan tur chungchang hi ngaihtuah tura tih ni mah se a hmaa Chief Minister Chandrababu Naidu-an party hruaitute tele-conference a neihpuinaah thutlukna hi chu an lo siamfel tawh a ni. TDP hian BJP president Amit Shah leh NDA-a tel party dangte hnenah an thutlukna siam leh an siam chhante hi ziakin an hriattir dawn a ni.

Andhra Pradesh Chief Minister Chandrababu Naidu chuan a kaihhruai TDP sorkar chuan an state tana sepcial status pe turin an ngen a, mahse an ngenna chu sorkar laipui chuan a ngaihthlak sak duh lo a ni, a ti. Naidu chuan, "Kum li chhung chu sorkar laipui hi kan ngen tawh a, mahse tunah chuan loh theih lohin kan state dikna humhalhna turin ka beihlet a ngai ta a ni", a ti.

TDP hian Lok Sabha-ah member 16 leh Rajya Sabha-ah member paruk a nei a, sorkar laipui a thlawpna hnukdawk mah se NDA dinhmun a ti derthawng pha lo a ni.

BJP hian Lok Sabha-ah party malin member 274 a nei a, sorkarna siam tura member ngai zat 272 chu member pahnihin a khum a ni. Party malin sorkarna siam thei mah se, inthlan hmaa a thawhpui party-te nen ṭangrual sorkar hi an siam zui a ni. NDA-a tel party hrang hrangte hian Lok Sabha-ah MP 331 leh Rajya Sabha-ah 79 an nei a, TDP tel lo hian Lok Sabha-ah member 315 leh Rajya Sabha-ah 73 a nei dawn ta a ni.