Sorkar officer luh tumte military service-ah kum nga tal thawh tir rawt

Armed forces-a officer leh rank dang indaih lohna nasa tak awm mek tihziaawmna turin Parliamentary Standing Committee on Defence chuan state leh central sorkar hnuaia gazetted officer china luh tumte tan kum nga tal military service-a an thawh phawt a rawt.

Sorkar laipui chuan state leh central government service-a direct recruitment-a luh tumte tan, kum nga tal military service-a lo thawh phawt chu tihmakmawha telh tura rawtna hi Defence Ministry chuan Department of Personnel and Training (DoPT) hnenah a thawn tih a sawi. DoPT chhanna hi nghah mek a ni.

Indian Army-ah hian an indaih lohna hi officer rank-ah 7,679 leh Junior Commissioned Officers/Other Rank-ah 20,185 a ni a, Navy-ah officer 1,434 leh sailor 14,730 niin, Indian Air Force-a indaih lohna hi officer 146 leh airmen 15,357 a tling a ni.

Report-in a tarlan danin Army officer sanction zat hi 49,932 niin, tuna awm zat chu 42,253 a ni a, JCO/ORs awm thei zat 12,15,049 a nih laiin tuna awm zat chu 11,94,864 a ni. Navy-ah pawh officer sanction zat hi 11,827 niin tunah hian 10,384 chauh an awm a ni. IAF-ah pawh officer awm thei zat 12,549 an neih laiin tuna awm zat chu 12,340 a ni.