Iran-ah India mi Covid-19 kai 255 awm Ram chhungah hri kai 147 awm tawh
Ministry of External Affairs chuan nimin khan ram pawn lama India mi awm zingah, tunlaia hripui leng, coronavirus kai 276 an awm tawh tih leh chung zinga 255 chu Iran-a awm mek India mite an nih thu Lok Sabha-a hrilh.
UAE-a awm mek mi 12, Italy-ah mi panga leh Hong Kong, Kuwait, Rwanda leh Sri Lanka-ahte pakhat ṭheuh an awm tih a hrilh bawk.
Sorkar chuan Covid-19 kai tih finfiahte chu an awmna rama awm rih tura hriattir an ni tih sawiin India-a an rawn let hmain an awmna ramah chuan enkawl phawt an nih tur thu a sawi. Sorkar laipui hian Iran-a awm India mi, hrileng kai lote chu an hruai haw tawh a ni.
Khung hran 40,000 vel awm tawh
Nimin thleng khan Covid-19 vei nia rinhlelh emaw zinchhuah vang emawa khung hran mi 40,000 chuang an awm tawh tih Ministry of Health chuan a sawi. Ram chhunga hri kai finfiah tawh mi 147 zingah mi 122 chu India mi an ni a, a dang mi 25 chu ram dang mi an ni thung.
Tourism industry nghawng na dawn
India rama tourism industry association lian ber Indian Association of Tour Operators (IATO) chuan tourism industry a nghawng nasa dawn hle tih sawiin, foreign exchange-ah ringawt pawh cheng vcb 15,000 vel hloh a ni dawn niin an chhut.
Thawhlehni khan March 31 thleng atan Culture Ministry chuan India rama khualzinte'n an tlawh ṭhin hmun hluite chu khar a nih thu a puang tawh a, Taj Mahal pawh khar a ni tawh. Covid-19 leng vanga khualzin an tlem dawn avangin March leh April thla hi chuan hna chan pawh an tam dawn hle tih IATO chuan finance minister Nirmala Sitharaman hnena lehkha an thawnah an ziak.
WHO-in ibuprofen ei lo turin thurawn pe
World Health Organisation chuan Thawhlehni khan Covid-19 kai emaw kai nia inhria emaw, hrileng vanga taksaa harsatna thleng ṭhin ang neite chu ibuprofen ei lo turin thurawn a pe.
France thuneitu lam chuan a hma pawhin anti-inflammatory drug-te chuan coronavirus hrik hi a tipunlun thei tih an lo sawi tawh bawk. Covid-19 hrik hi ibuprofen hian a tipunlun thei em tih finfiahna chiah la awm lo mah se, ei loh a him niin an ngai. Hemi rual hian thil dang avanga he damdawi ei mekte chu an doctor-te rawn hmasa phawt loh chuan an ei lai titawp ngawt lo turin an ti thung.
WHO thupuangtu Christian Lindmeier pawhin tun dinhmunah chuan ibuprofen ei loh chu a ṭha rihah a ngaih thu sawiin, khawsik nei tan pawh paracetamol ei zawk turin a ti a ni.
4 Minister of information and broadcast Ravi Shankar Prasad chuan BSNL shut down tumna a awm lo tih a sawi.
4 Nimin thleng khan India ramah kai 147 an awm tawh.
4 Thihpui pathum an awm tawh.
4 Hripui kai ṭha chhuak leh 14 an awm tawh bawk.
4 Hripui kai damdawi-ina enkawl mek 130 an awm.
4 State 16-ah hrikai hmuhchhuah an awm tawh.
4 Maharashtra-ah Covid-19 kai an tam ber a, 41 an awm.
4 Ramchhung hmun hrang hrangah rel 85 din tir a ni tawh.