SC-in Omar Abdullah chhuah turin sorkar laipui a ti

Supreme Court chuan nimin khan Jammu and Kashmir chief minister hlui leh National Conference leader Omar Abdullah chu chhuah tumna a nei em tih sorkar laipui hnenah an zawt a, chhuah tumna a nei lo a nih chuan a farnuin Omar hrenna a khinna chu an ngaihtuah dawn tih a sawi.

"Omar Abdullah hi in chhuah dawn a nih chuan chhuah thuai rawh u, a nih loh chuan a farnuin hren a nih vanga thubuai a thehluh chu kan ngaihtuah ang," tiin SC chuan a sawi a ni. NC leader hi August 5-a J&K special status Article 360 tihtawp a nih aṭang khan Public Safety Act (PSA) hnuaiah hren a ni a, a farnu Sara Pilot chuan February 5 khan a nuṭa a manna chu  fundamental rights palzutna nia sawiin, dan kalh a ni tiin Habeas Corpus petition a thehlut.

Thla ruk a liam hnu pawhin state thuneitute chuan PSA hnuaiah hian an pawtsei leh a ni. Sara chuan a nuṭa chu remna leh muanna duh mi a ni tih leh chumi finfiahna chu a tweet siamahte leh thuchhuah a siamahte pawh hmuh theihin a awm tih a petition thehluhah chuan a ziak.

Kar hmasa khan Omar pa NC president Farooq Abdullah hrenna chu hlih sak a ni a, thla sarih zet pawn chhuah phalsak loh a nih hnuah a chhuak leh thei tawh a ni. Farooq hian thuchhuah engmah a la siam duh lo a, an party hruaitu zawng zawng chhuah an nih hma loh chuan politics kaihhnawih thuchhuah engmah a siam dawn lo tih a sawi.