Supreme Court judge thar 9-te lalut

Chief Justice NV Ramana chuan nimin zing khan Supreme court judge atana ruat mi pakuate chu rinawmna thu tiam tirin a lalut a, judge lakluh thar zingah hian hmeichhia pathum an tel.

India chanchinah Supreme Court judge atana ṭum khatah mi pakua lakluh a nih vawi khatna a ni. Judge thar lak luhna hun hi Court additional complex-a auditorum-ah neih a ni. Supreme court judge lakluh hi tihdan ṭhinah chuan chief justice court room-ah neih a ni ṭhin.

Judge lakluh thar zingah hian Justice Abhay Oka (former Chief Justice of Karnataka High Court ), Justice Vikram Nath (former Chief Justice of Gujarat High Court), Justice Jitendra Kumar Maheshwari (former Chief Justice of Sikkim leh Andhra Pradesh High Courts) leh Justice Hima Kohli (former Chief Justice of Telangana High Court) te an ni.

Justice BV Nagarathna (former Karnataka High Court judge) pawh lakluh tel a ni. Justice Nagarathna hi Chief Justice hlui Justice ES Venkataramiah-a fanu a ni a, kum 2027 khian India rama hmeichhia Chief Justice hmasa ber a ni thei dawn. Mahse he dinhmun hi thla khat vel bak a chelh hman dawn lo thung.

Judge lakluh thar dangte chu Justice CT Ravikumar (former Kerala High Court judge), Justice MM Sundresh (former Madras High Court judge), Justice Bela M Trivedi (former Gujarat High Court judge) leh Justice PS Narasimha (senior advocate leh former Additional Solicitor General) te an ni.

Justice Nagarathna bakah hian seniority level angin judge pahnih dang hi Chief Justice ni thei dinhmunah an ding mek bawk. Justice Vikram Nath chuan February -September, 2027 inkar leh Justice PS Narasimha chu October 2027 - May 2028 inkar chhungin Chief Justice an ni hman dawn tihna a ni.

Judge atana ruat thar zingah hmeichhia pathum- Justice Nagarathna, Justice Kohli leh Justice Trivedi-te an tel avang hian ramchhunga court sang bera hmeichhiate chanvo a tlem thei dawn nia hlauhthawn rukna awm ṭhin chu a thlak danglam theih beisei a ni. Supreme court din tirh aṭang khan hmeichhe tlemte chauhin SC-a judge nihna hi an la chelh thei.

Kum 1989 khan M Fathima Beevi chu hmeichhe zinga SC judge atana ruat hmasak ber niin, kum 70 liamta chhung khan hmeichhia pariat chiah thlan chhuah an la ni. Tunah hian Justice Indira Banerjee chiah hi hmeichhe judge awmchhun a ni a, Madras High Court-a Chief Justice a nih laiin August 7, 2018 khan SC judge-ah hian hlankai a ni.

Judge thar pakua lakluh belh an nih tak avangin Supreme Court-ah hian Chief Justice telin judge awm thei tur zat 34 aṭangin 33 an awm tling ta a ni.