Rahul Gandhi-a'n Jallianwala Bagh memorial cheiṭhat sawisel 'Ram tana nun hlantute zah lohna a ni'

Congress party hruaitu Rahul Gandhi chuan BJP kaihhruai sorkar laipui chu Jallianwala Bagh memorial a cheiṭhat chungchangah na taka sawiselin, an thiltih chu ram tana nunna hlantu, martar-te zah lohna a ni, a ti. Heng thil hi inzah lo taka chetna hi ram tana nun hlantute hlutna hre thiam pha lote chauhin an thlen tih a sawi bawk.

Sorkar laipui chuan Amritsar-a Jallianwala Bagh memorial chu sorkar laipui hian chei ṭhain, kar liam tak Inrinni khan prime minister Narendra Modi chuan a hawng a ni.

Jallianwala Bagh hi kum 1919, April 13-a India mite chhiah tam tak chawitir an nih leh, India sipaite chungah British sipaite inlulinna duh lohna lantira public meeting-a telte chu British sipaiten minute 19 chhung vel an pawng kah a ni. British lam chuan mi 379 an thi niin an sawi a, mahse India lam chuan thi hi mi 1,000 dawn an tling niin an sawi thung. He thil thleng hi India nationalist movement lo inṭanna pawimawh tak nia sawi a ni ṭhin.He hmunah hian nunna chante hriatrengna hi siam zui a ni. Mahse BJP sorkar chuan he hmun hi cheiṭhain, museum gallery te a hawn bakah, sound leh light show-te a siam tel bawk. British sipaite silai mu laka inphenna atana an hman, Martyrrs; Well tih chu an khuh zui bawk.

Hriatrengna lungphum an khawihdanglam a duh loh zia lantirin Rahul chuan,

" Martar fapa ka ni a - martar te chunga hmuhsitna thleng ṭhin chu ka phal ngai dawn lo. Rawng taka chetna hi kan dodal zel dawn a ni," tiin twitter kaltlangin a sawi.

Rahul chuan zalenna sual tura beitute chauh lo chuan an hmalakna an hrethiam dawn lo tih a sawi.

Amritsar-a Jallianwala Bagh memorial an cheiṭhat avang hian social media-ah sawiselna tam tak hmuhtur pawh awmin, India chanchin thaichhiat tuma hmalaknaah an ngai a ni.