Congress CWC ruat turin Rahul Gandhi thuneihna pe

Congress plenary session vawi 84-na, ni thum awh chu kar kalta Zirtawpni khan New Delhi-a Indira Gandhi Indoor Stadium-ah neih ṭan a ni a, nimin khan an ṭiak.

Plenary Session hian inthlannaa Electoral Voting Machine (EVM) hman aiin, tun hma lama lo hman ṭhin Ballot Paper hman leh chu ṭha an tih zawk tih an sawi.

Congres president Rahul Gandhi chu Congress Working Committee ruat turin thuneihna pek a ni bawk. He rawtna siamtu, party hruatui Ghulam Nabi Azad chuan an party chanchinah CWC member tur a thlanna buatsaih chu ṭum tlemte chauh a ni tih sawiin, a tam zawkah chuan party president ruat turin dah a ni ṭhin a ni, a ti.

Session-ah hian party hruaitu hrang hrangten thu an sawi a, central-a BJP kaihhruai NDA sorkar chu na takin an sawisel bawk. Prime Minister hlui Manmohan Singh pawhin thu sawiin, Prime Minister Narendra Modi chu 2014 Lok Sabha inthlan dawna a campaign-naa thil tam tak tiamin, heng thutiamte hi hlenchhuah a la ni lo a ni, a ti. Singh chuan Modi hian thuneihna an chan chuan hna thar vaibelchhe hnih siam a tiam a, mahse tun thlengin hna thar hi nuai hnih pawh siam a la ni lo, a ti. Union Finance Minister hlui P Chidambaram pawhin thu sawiin, Modi-a kaihhruai BJP sorkar chuan mi tam tak retheihna khurah a nawr lut niin a sawi.