Parliament in hnih inkhawm titawp lailawk : No-confidence motion la ngaihtuah thei lo

Nimina Parliament in hnih, Rajya Sabha leh Lok Sabha rorel inkhawm chu rorel thei loa member-te an aubuai avangin tihtawp lailawk a ni a, vawiinah chhunzawm leh a ni ang.

Tun hnaia BJP kaihhruai NDA aṭanga inhnukdawk, Telugu Desam Party (TDP) leh YSR Congress Party-ten Lok Sabha-a Prime Minister Narendra Modi-a kaihhruai sorkar rin tawk lohna, no-confidence motion an putluh pawh House Speaker Sumtira Mahajan-in motion thlawptu MP zat a chhiar theih loh vangin ngaihtuah ala ni lo.

Kar kalta Zirtawpni khan Speaker Mahajan hian no-confidence notice hi a dawng a, mahse hemi ni pawh hian rorel mumal thei loa House-a member-te an aubuai avangin Thawhṭannia ngaihtuah turin a lo dah tawh a ni.

March 16 khan Andhra Pradesh CM, TDP hotu Chandrababu Naidu chuan sorkar laipuiin Andhra Pradesh tana special category status a pek duh loh vanga lungawi lohna lantirin, NDA an thlawpna a hnukdawk a, hemi hma hian an party mi, union minister pahnihte chu minister an nihna aṭangin an lo bang tawh bawk.

TDP leh YSR Congress-ten no-confidence motion putluh an tum hi eptu party dang, Congress, Left Front, Samajwadi Party, Trinamool Congress leh AIAMIM-te chuan an thlawp tur thu an sawi a, BJP thawhpui Shiv Sena erawh chuan vote thlak huna hai a tum thung. No-confidence motion putluh hi sawiho a, vote la tur chuan motion thlawptu member 50 tal an awm a ngai a ni. TDP hian MP 16 neiin, YSR Congress hian member pakua a nei a, hei vang hian eptu party member dangten an motion an lo thlawppui a ngai dawn a ni. Mahse BJP hian Lok Sabha-a seat 543 awmnaah member 315 a nei a, a dinhmun a derthawng pha dawn chuang lo a ni.

Eptute chuan sorkar paihthla turin member ngah tawk lo mah se, sorkar an hmuh dan lantir an tum tih an sawi. Congress hruaitu Renuka Choudhary chuan number zawngin hneh dawn lo mah se, sorkar chu zirtirna pek a ngai a ni, a ti.