Congress-in loneitute loan ba ngaihdam sak a tiam

Congress Party chuan central-a sorkarna siam tura thlan tlin an nih chuan, kum 2009-a UPA sorkarin a lo kalpui tawh angin loneitu tenau zawkte loan ba ngaihdamna tur scheme a siam dawn tih a sawi.

Pathiannia neih zawh tak, 84th Plenary Session-ah khan 'Agriculture, Employment and Poverty Alleviation' resolution siamin, Prime Minister Narendra Modi-a kaihhruai sorkar chu loneitute ngaihthahah puhin, an policy avangin ramchhunga loneituten harsatna lian tak an tawh phah a ni, an ti.

Resolution hi Punjab Chief Minister Amarinder Singh-a putluh a ni a, BJP kaihhruai NDA sorkarin loneitute hnena a thu lo tiamte a tipuitlin loh chungchang sawichhuakin, kum 2022-a loneitute sum lakluh a leta tihpun a tiam pawh loneitute a bumna hmanrua mai a ni, a ti.

Congress chuan kum 2009-a UPA sorkarin loneitute hamṭhatna tur scheme a siam kha ramchhunga loneitu vaibelchhe 3.2 in an chhawr niin a sawi bawk.

Modi-a kaihhruai sorkarin crop insurance scheme a siam chu a takah chuan loneitu ni loin insurance company-ten an hlawkpui zawk niin Congress chuan a sawi a, loneitute sum chu an remtihna pawh ni loin an bank account aṭangin laksak an ni, a ti. Sorkar laipuiin mi retheite ngaihthah zawnga policy a siam avangin ram mipuite sum lakluh inthlauhna pawh a nasa chho hle a, BJP chuan thu ṭha tak tak tiamin, an thutiam letling chiaha che leh siah an puh a ni.

Nakkuma Lok Sabha inthlanpui neih hunah Congress party chuan thuneihna a chang a nih chuan, loneitute hamṭhatna leh hmasawnna ngaihtuahtu tur commission nghet a din tur thu sawiin, loneitute tan a pung awm loa loan puk theihna tur pawh an siam dawn tih an sawi bawk.