Lalu Prasad-a a thubuai pali-naah thiam loh chantir

Ranchi, Jharkhand-a special CBI court chuan nimin khan Bihar Chief Minister hlui leh RJD hout Lalu Prasad Yadav chu ran chaw man tihchingpen chungchanga thubuai siamsak pali-naah thiam loh a chantir leh.

Hetih lai hian Bihar CM hlui vek, Jagannath Mishra erawh chu he thubuaiah hian thiam chantir a ni thung.

Lalu Prasad hi ranchaw man tihchingpen kaihhnawih thubuai pathumah thiam loh chantir lo ni tawhin, heng thubuaiah hian kum 13.5 chhung jail tang tura hrem a lo ni tawh a ni. Ranch-a Birsa Munja jail-ah a tang mek a, mahse a dam loh avangin kar kalta Inrinni khan Rajendra Institute of Medical Sciences (RIMS)-ah dahluh a ni. Niminah court-in thutlukna a puan pawh hian a inlan thei lo a ni.

Nimina thiam loh chantir a nihna hi Lalu-a chief minister a nih laia Dumka treasury aṭanga dik lo taka cheng vaibelchhe 3.13 lakchhuah a nih chungchang thubuai a ni. He thil thlengah hian CM hlui Janaganath Mishra leh midang 29 pawh inhnamhnawiha puh an lo ni tawh a, mahse Mishra chu thiam chantir a ni ta thung a ni.