No-confidence motion la pharh thei lo: Lok Sabha leh Rajya Sabha inkhawm titawp leh

Nimina Parliament in hnih, Lok Sabha leh Rajya Sabha rorel inkhawm chu rorel thei loa member-te an aubuai leh avangin inkhawm titawp a ni a, eptuten sorkar rin tawk lohna, no-confidence motion putluh an tum pawh pharh theih a la ni lo.

Lok Sabha inkhawm chu ṭan anih velah eptu member-te chu Speaker podium bulah kalkhawmin, sorkar laka lungawi loh thute an aupui bakah lehkha ziakte an keng a ni. Member-te aubuaina karah Speaker Sumitra Mahajan-i chuan Question Hour kal luihpui a tum a, mahse an au bengchhen zual zel avangin chhun dar 12 thleng inkhawm a titawp ta a ni.

Chawhlawk hnua inkhawm chhunzawm a nih pawhin member-te an au buai zel avangin rorel theih a ni lo a, hei vang hian Speaker chuan nimin atan inkhawm hi a titawp ta a ni. Speaker chuan rorel inkhawm mumal taka kalpui theih a nih loh vangin no-confidence mtoion pawh chu ngaihtuah theih a ni lo tih a sawi. He motion puluttu zinga mi, YSR Congress MP YV Subba Reddy chuan Lok Sabha Secretary General hnenah an motion putluh chu Nilaini-a ngaihtuah tur zingah telh turin a ngen nghal a ni.

Nimin khan Budget Session thawh hnihna ṭan aṭanga a ni 12-na a ni a, nimin thleng khan member-te au buaina avangin rorelna mumal kalpui theih lohin House a la awm a ni. Session thawh hnihna hi March 5 khan ṭan niin, April 6 thleng a awh ang.

Rajya Sabha-ah pawh Chairman M Venkaiah Naidu-an Zero Hour a hawn hnuah eptu member-te an aubuai avangin inkhawm tihtawp a ni bawk.

Hetih lai hian Tamil Nadu-a rorellai, AIADMK chuan Andhra Pradesh-a sorkar lai, TDP leh eptu YSR Congress-ten NDA sorkar rin tawk lohna motion putluh an tum chu an thlawp dawn lo tih a sawi. AIADMK hruaitu P Venugopal chuan no-confidence motion hi Andhra Pradesh ṭhatna tur chauh a nih avangin an ngaihven ve lo tih a sawi a, anni chuan Cauvery lui tui insem chungchanga an buaina chingfeltu tur, Cauvery Management Board din an duh ber a, Board hi din a nih hma chuan Parliament-a an party chuan an aupui chhunzawm zel dawn tih a sawi.