Iraq-ah IS-in India mi an hrente tihlum

Kum li kaltaa Iraq-a Islamic State (IS) firfiakten India mi 30 an hrente chu an that vek niin nimin khan Foreign Minister Sushma Swaraj-i chuan Parliament-ah a sawi.

Sorkar laipui chuan tunhnaia Mosul leh Badush-a thlana ruang awmkhawm hmuh zinga mi 38-te DNA chu enfiah a nih hnuah, kum li kaltaa India mi chin hriat loha awmte DNA nena a inmil vek nia thu an dawn thu a sawi a, ruang pakhat erawh chu 70% a inmil thung. Foreign minister-in India mi rukbote thah an nih thu a sawi hnuah hian Rajya Sabha-ah chuan a sunna minute ngawi rengin an ding nghal a ni.

India mi rukbote hi Punjab, Bihar, Himachal Pradesh leh Bengal aṭanga kalte an ni a, kum 2014-a IS-in Iraq khawpui lian pahnihna, Mosul khua an beih khan rukbo an ni. India mite hian Mosul khua chhuahsan an tum laiin firfiakte hian an man nia sawi a ni.

India mite hi rukbo an nih hnu hian hun rei tak an chin hriat zui lohin an awm a, mahse nikum khan Swaraj-i chuan an chhungte hnenah Iraq official-ten India mi rukbote hi hospital sakna hmuna thawhtir an nih hnuah, Badush-a jail-ah an dah niin VK Singh an hrilh thu alo sawi tawh a ni.

Eptute chuan thi chhungte an tuarpui thu an sawi rualin, sorkar laipui chu hnathawktu chhungte hnenah jail-ah an awm nia thu dik tawk lo hriattir leh, beiseina siamsakah an puh. Congress member Partrap Singh Bajwa chuan Swaraj-in jail-a an tanna nia a sawi pawh hi a chhe vek tawh niin a sawi bawk.

Kum 2014-a IS firfiak leh Iraq sipaite inbeihna thleng vang hian Iraq rama India mi awm 10,000 chuang zet chu India ramah hruai haw a ni. An zingah hian IS firfiakten Tikrit leh Mosul-a hun eng emaw chen an hren, nurse-te pawh an tel a ni.