Air pollution-in India mi 40% te nunna kum 9-in titawi thei

US research group-in an zirchianna report an tihchhuahah, India rama cheng zinga 40% vel chu boruak bal,air pollution vangin an nunna kum kua velin a tihtawi phah thei dawn niin an sawi.

Energy Policy Institute at the University of Chicago (EPIC)-in report a tihchhauhah hian India ram laili, khawchhak leh hmarlam bial Delhi khawpui telin, hemi huam chhunga cheng mi maktaduai 480-te chu air pollution level sang tak hnuaiah an awm a ni tiin, India ram hmun dangah pawh pollution level hi a sang chho niin an sawi.

Boruak bal leh bawlhhlawh hian mihring nunna a tihtawp phah theih laiin, boruak ṭha leh thianghlim chuan mihring dam chen chu kum nga thlengin a tihsei theih phah bawk tih report-ah hian an tarlang.

India ram khawpui hrang hrangte hi khawvela air pollution level sanna zingah an tel hlawm a, kumtinin mi nuai tel chu boruak bawlhhlawh vang hian an lo thih phah ṭhin bawk.

EPIC report chuan India ram hmarlam air pollution level chu khawvel hmun dang aiin a let 10 zetin a chhia tih an sawi. Maharashtra leh Madhya Pradesh state-ah chuan kum 2000 aiin boruak bawlhhlawh zel avangin mipui nawlpuite dam chen tura beisei hi kum hnih leh a chanve in a tawi tawh bawk niin a tarlang. Delhi khawpui chuan boruak bawlhhlawhte tihniam a, World Health Organisatiion guideline anga 10 µg/m³ a tihhniam theih chuan mipuite dam chen chu kum 10 thlengin a pawhsei phah thei tih an sawi bawk a ni.