Covid-19 kai thar 41,965 awm belh leh : Thawhṭanni aiin 35.6% in hri kai pung

India ramah Thawhlehni khan Covid-19 kai thar 41,965 an awm belh leh a, Thawhṭannia hri kai thar mi 30,941 nena khaikhinin hri kai hi 35.6% in an sang zawk. Hemi ni vek hian hri kaihhnawih vanga thi 460 an awm bawk.

Nitina test aṭanga hri kai zat, daily test positivity rate chu 2.61% a ni mek.

Hri kai thar 30,203 awmna Kerala chu ramchhunga hri kai hmuhchhuah tam na ber state a ni a, hri vanga thi 115 an awm bawk. Tamil Nadu-ah hri kai thar 1,512 awm bawkin , Karnataka 1,127, Andra Pradesh 1,115 te chu state zinga hri kai hmuhchhuah tam zualna te an ni.

State lian pali Rajasthan-ah hri kai thar 2, Bihar (8), Madhya Pradesh (10), Gujarat (12) - ahte chuan hri vanga thi an awm lo. Jharkhand pawhin Covid vanga thi an nei lo.

Covid vaccine dose vaibelchhe 1.33 semchhuah belh leh nen India chuan Thawhlehni khan vaccine semchhuahna kawngah mellung pawimawh tak a siam leh. Ramchhungah vaccine dose vaibelchhe 65 chuang semchhuah a ni tawh. India hi August 27 khan nikhata dose vaibelchhe khat semchhuak thei ram hmasa ber a lo ni tawh a ni.

Bombay High Court chuan Thawhlehni khan Mumbai huamchhunga mipui punkhawmna tam lutuk chu ngaimawhin, khuahkhirh emaw thunun emaw a nih vat loh chuan khawpui hian kumin kumtira Covid-19 hripui leng thawh hnihna na tak ang kha an hmachhawn leh thei niin a sawi.

State tam taka Covid-19 kai thar tam chho leh chu hri leng thawh thumna inṭanna a nih theih thu ICMR-a Head of Epidemiology and Communicable Diseases Dr Samiran Panda chuan a sawi. Dr Panda chuan Covid-19 chungchangah state tinte dinhmun a in an loh avangin state dinhmun azirin kalphung dang deuh kan mamawh ṭheuh dawn a ni, a ti.

State mipui nuai 11 in Covid-19 vaccine an lak tawhna West Bengal-ah Thawhlehni khan Jalpaiguri district vaccination centre-a innekbuaina thleng vangin mi 20 velin hliam an tuar. Khaw bulhnai leh thingpui huan neitute hi khawvar hmain centre gate kawtah vaccine la turin an pungkhawm tawh a ni.A hmuna awmte chuan mi 2,000 vel an pungkhawm tih sawiin, vengtu police hmuh tur pawh an awm mang loh thu an sawi.

Covid hri leng thawh thumna a thleng leh mai dawn nia sawi karah state ṭhenkhat chuan zirna in an hawng ṭan tawh a, heng state-ah hian naupang zingah hri kai an pung chho nia sawi a ni.

India gross domestic product (GDP) chu April-June period / first quarter of 2021-22 chhungin 20.1 % in nasa takin a ṭhan belh. Coronavirus hripui leng vanga lockdown-te puan a nih avangin nikum hemi ang hunah kha chuan -24.4% a ni hman a ni.

S-CoV-2 variant thar chu South Africa leh ram ṭhahnem taka hmuchhuah leh a ni a, a hma aiin inkaichhawn a awlsam mai bakah vaccine in venna a pek pawh a tinep thei niin zirchianna chuan a tarlang. Variant thar hi variants of concern (VOCs) emaw variants of interest (VOIs) dangte aiin a inthlak danglam nasa zawk niin zirchiangtute chuan an sawi bawk.