Rahul Gandhi-an team thar din dawn ; Congress hruaitu senior-te an bang ṭan

Congress party president Rahul Gandhi chuan team thar a din dawn a, hemi atana kawng hawng tur hian party senior ṭhenkhatten banna an thehlut ṭan.

Actor-politician Raj Babbar chu Uttar Pradesh Congress hotu a nihna aṭangin a bang a, Gujarat-a Congress hotu Bharatsinh Solanki pawhin central-a an party hotute hnenah banna a thehlut bawk. Thawhṭanni khan Goa Congress president Shantaram Naik pawh a lo bang tawh a ni. Hruaitu dangte pawhin banna hi an thehlut chhunzawm dawn nia sawi a ni.

Kar hmasaa New Delhi-a Congress Plenary Session neihah party president Rahul Gandhi chu Congress Working Committee (CWC) ruat turin thuneihna pek a ni. Congress Constitution-ah chuan CWS member 25 zinga 12 chu All India Congress Committee (AICC) palaiten an thlan tir tih a ni a, a bak 13 chu Congress president hian a ruat dawn a ni

Hetih lai hian CWC hi kum sawmhnih chuang zet inthlang loin member tur hi ruat an lo ni tawh a ni. CWC-a inthlan neih hnuhnun ber chu kum 1997 khan a ni.

Kum 2013, January thlaa party vice president atana Rahul Gandhi ruat a ni leh, nikum kumtawp lama president atana hlan kai a nih hnuah an party kalphung siamṭha a, ṭhalai zawkte chanvo pawimawh pekchhoh a tum a, he ruahmanna a siam thu hi Pathianni-a plenary session-ah pawh a lo sawichhuak tawh a ni. Hei vang hian hruaitu senior zawkte chuan ṭhalaite tana hmun kian turin banna hi an thehlut a ni.

Goa Congress president, kum 72 mi Naik chuan AICC-ah a banna hi thehluin, ṭhangthar zawkte tana hmun kian turin a bang tih a sawi. Naik chuan Rahul Gandhi-an ṭhalai zawkte hun pek a duh thu a sawi chuan a rilru a hneh hle tih a sawi.