BJP MP-in MP-te hlawh 'cut' sak a rawt

Bharatya Janata Party (BJP) MP Major Tiwari chuan Lok Sabha Speaker Sumitra Mahajan-i hnenah lehkha thawnin, Parliament session neih mek chu rorel mumal thei loa hun rei tak a awm tawh avangin MP-te hlawh 'cut' sak turin a rawt.

Parliament in hnih–Lok Sabha leh Rajya Sabha-a Budget session thawh hnihna neih mek chu member-te aubuai leh lungawi lohna lantir avangin ni 13 chhung rorel thei loin an awm tawh a ni.

BJP MP Tiwari chuan Lok Sabha Speaker hnena lehkha a thawnah, mipuiten an aiawh tura an thlan ten an mawhphurhna hre lo leka rorel thei loa an awm reng chu thil pawi tak a nih tih a sawi a ni.

Hei vang hian session neih chhungah hna mumal thawh an neih loh avangin hlawh pawh 'cut' sak turin a rawt a, hna thawk lo chuan hlawh pawh an la tur a ni lo tih chu an zawm a ngai a ni, a ti.

Hetih lai hian Telangana Rashtra Samiti (TRS) MP K Kavitha chuan sorkar laipui chuan a hna dik takin thawk ni se, MP-te chuan lungawi lohna an lantir a ngai dawn lo niin a sawi thung. Kavitha chuan party leh MP-te chuan House chhunga lungawi lohna lantir chu an duh bik lo tih a sawi a, mahse sorkarin a hna tur a thawh loh avangin loh theih loha sorkar an nawr a ngai ta niin a sawi.

Nimina Lok Sabha inkhawmah pawh member-te aubuai avangin Telugu Desam Party (TDP) leh Yuvajana Shramika Rythu (YSR) Congress Party-ten sorkar rintawk lohna motion an putluh pawh ngaihtuah theih lohin dah leh a ni.

Speaker Mahajan-in chuan hetianga House chhunga boruak ṭha lo hi a la awm ngai lo tih sawiin, no-confidence motion ngaituah thei dinhmunah House chu a awm lo a ni tiin rorel inkhawm a titawp leh a ni.

Rajya Sabha-ah pawh rorel inkhawm ṭan a nih hnu lawkah eptu member lungawi lote aubuai avangin inkhawm tihtawp a ni bawk.