Cabinet-in health protection scheme Ayushman Bharat a pawm

Union cabinet chuan Ayushman Bharat–National Health Protection Mission (AB-NHPM) kalpuina tur chu Thawhṭanni khan a pawm a, he scheme hmang hi ramchhunga mi rethei chhungkaw vaibelchhe 10 chuangin an chhawr thei dawn a ni.

AB-NHPM hi Modicare tia sawi a ni a, khawvela sorkar hnuaia heath care programme lian ber tur a ni. He scheme siam centraly sponsored scheme kalpui mek, Rashtriya Swasthya Bima Yojana (RSBY) leh Senior Citizen Health Insurance Scheme (SCHIS) chu beitir nghal an ni ang.

He scheme hnuaiah hian ramchhunga mi rethei chhungkaw vaibelchhe 10 chuang chu damdawi lama inenkawlna cheng nuai nga chin thleng pek theih an ni ang. He hamṭhatna dawng thei tur chhungkuate chuan damdawiin-ah pawisa pek kher ngai loa inenkawlna, cashless treatment an dawng thei dawn a ni.

Union Health Minister JP Nadda chuan National Health Protection Mission pawm a nih vang hian Prime Minister Narendra Modi leh Union Cabinet chungah a lawm hle tih a sawi a, he scheme hi khawvela public health programme lian ber zinga mi a ni dawn tih a sawi. He scheme hi mitin te an dam loh pawha inenkawlna ṭha leh remchang an dawn theihna tur a ni tiin, mirethei ten an ṭangkaipui dawn hle a ni, a ti.

Finance Minister Arun Jaitley-an February thla tira Union Budget 2018 a pharh ṭum khan NHPM siam a nih tur thu hi a lo sawi tawh a ni. February 7 khan Union Cabinet chuan health and medical sector tichangtlunna turin cheng vaibelchhe 14,930 a lo pawm tawh a, heng zingah hian unreserved area-a medical college 24 din tharna tur pawh a tel. Sorkar laipui chuan nursing and midwifery school 248 din thar a tum bawk.

Parliamentary constituency 3-5 zelah medical college pakhat tal dah a, state tinah government medical college pakhat tal dah tum a ni. He scheme hmang hian ramchhunga MBBS seat 10,000 leh PG seat 8,000 siam belh tum a ni.