J&K-a separatist leader Geelani a thi

Jammu and Kashmir-a inlakhran duhtu pawl hruaitu, Syed Ali Geelani chu hun rei tak a dam loh hnuah kum 92 mi niin Nilaini zan khan a thi.

Geelani hi kum 11 chhung house arrest-a hren a lo ni tawh a ni. Geelani hian Srinagar-a martar thlanmualah phum a duh a, mahse sorkar chuan hei hi remti loin nimin zing khan police-te chuan a ruang hi laksakin hmun dangah an phum niin a chhungte chuan a sawi. A phum fel hnuah, zing dar 10 velah a thlan hi an hmuh an phalsak ve chauh niin a fapa, Naseem Geelani chuan a sawi.

Thuneitute chuan Geelani thlawptute an punkhawm a, buaina a chhuah venthawn thilah a in chhehvel bakah kawngpui leh checkpoint-ahte sipai ṭhahnem tak an duty tir nghal a ni.

Pakistan prime minister Imran Khan chuan Geelani a ui thu sawiin, 'zalenna sualtu' a ti a, nimin kha Pakistan ramah Geelani sunna ni atan a puang. Geelani chuan a dam chhungin mipuite dinna chanvo humhalh tumin a bei a ni, a ti. Pakistan hian kum 2020 khan civil mi chawimawina sang ber a pek ṭhin, Nishan-e-Pakistan chu Geelani hi a hlan a ni.