Thla 2 hnua Covid-19 kai tam ni ber thleng

India ramah Nilaini khan coronavirus kai leh hri vanga thi an pung chho leh. Union health ministry tarlan danin Covid-19 kai thar 47,092 an an awm a, hei hi thla hnih hnua ni khatah hri kai tam ber ni niin, hri vanga thi 509 an awm bawk a ni.

Hri kai hmuh chhuah tawh hi 3,28,57,937 awmin, mi 4,39,529 in an thihpui tawh. Hri kai mek, active case 3,89,583 an awm mek bawk.

Sorkar laipui chhinchhiah danin Nilaini khan Covid-19 vaccine la mi 81,09,244 an awm. Covid-19 vaccine la tawh zat hi 66,30,37,334 an tling tawh a ni.

Kartina hri kai zat chu 2.62% ni mekin, ni 69 chhung 3% hnuailamah a awm tawh. Nitina hri kai thar zat, daily positivity rate chu 2.80% a ni.

Coronavirus kai hmuhchhuah tamna Kerala chuan hri kai thar 32,803 leh thihpui mi 173 an neih belh leh. Maharashtra-ah hri kai thar 4,456 leh hri kaihhawih vanga thi 183 an awm

Delhi-ah chuan ni 20 chhung Covid-19 kaihhnawih vanga thi an awm tawh lo a, Nilaini khan hri kai thar mi 36 chiah an awm bawk.

Covid-19 case pung zel vangin Drug Controller General of India (DCGI) chuan Hyderabad-a hmunpui nei Biological E Limited hnenah naupang kum 5-18 inkar tan anti-COVID shots Corbevax chu clinical trial phase 2 leh 3 kalpui turin phalna a pe. Biological E in trial an paltlang chuan Covaxin leh Zycov-D (Zydus Cadila) dawta naupang tana pawm, coronavirus vaccine pathumna tur a ni ang. Sorkar laipui chuan Biological E vaccine dose vaibelchhe 30 leinan Rs vbc 1,500 a pe lawk tawh a ni.

Zydus Cadila 'needle-free' COVID-19 vaccine ZyCoV-D hian thla hmasa khan naupang kum 12-18 inkar tan emergency use authorisation (EUA)-an hmu tawh a. October thla tir lama hmanchhuah theih beisei a ni. Bharat Biotech siam Covaxin Covid-19 vaccine naupang tana lak chi chu trial 2 leh 3 kalpui mek a ni a, tunthla hian a result hriat hman beisei a ni.