Kerala panchayat-in office dawrtuten Sir leh Madam tih hman khap

Kerala-a Mathura village panchayat chuan an office dawrtute chu official-te Sir, Madam tia ko lo tura tiin, an hming emaw, an nihna emaw hmanga ko zawk turin a ti. Hei hi mipuite leh thawktute inpawhna ṭha zawk siamna atana an tih a ni.

Panchayat member-te chuan 'sir, 'madam' tih chu colonial era laia chin dan a ni tiin, hei hi tihtawp an tum. India rama civic body zingah hetianga inkohna khap hmasa ber a ni a, midangte pawhin an entawn chhoh a rinawm.

Mathura Panchayat vice president PR Prasad chuan an thil tum ber chu office dawrtu, mipui leh office-a official-te inkara inpawhna ṭha leh, office boruak ṭha a awm theih thu a sawi. 'Sir' leh 'Madam' tia inkoha indawr chuan inpawh tak tak a har a ni, tiin democracy ramah chuan mipuite chu an lal ber a, hnathawktu leh official-te chu mipui rawngbawltu an ni, a ti.

Salutation hman khap hnuah office kawtah hriattirna tarin, 'Sir' leh 'Madam' tih an hman loh avanga ngaihsak an hlawh loh phah a nih chuan panchayat president leh secretary hnenah complaint thehlut turin an ngen.