Anna Hazare-an chaw ngheia nawrh huaihawt

Social activist Anna Hazare chuan nimin khan New Delhi-ah tiam chin awmloa chaw ngheia nawrh a huaihawt ṭan.

Anna Hazare hian Prime Minister Narenra Modi-a kaihruai BJP sorkar chu eirukna thleng ṭhin chhuitu tur, Lokpal ruat duh lohah a puh a ni. Nimina nawrh a huaihawtna hi kum 2011-a nawrh a lo huaihawt tawhna, Ram Lila Maidan-ah bawk a nei leh a ni.

Kum 2011 khan Hazare hian hetihlaia sorkarna changtu, Congress kaihhruai UPA sorkar chu Lokpal din tura phutin nawrh a lo huaihawt tawh a ni. Hazare hian central-ah Lokpal leh state-ah Lokayukta din a phut a, hei bakah hian loneitute harsatna chinfel dan tur rawtna siamtu, Swaminathan Commission report chu a taka kalpui a phut bawk. Hemi ṭuma a nawrh huaihawt hian ramchhung hmun hrang hrangah thlawptu a ngah hle.

Hazare chuan nawrh huaihawtnaa tel tumten Delhi an panna tur rel-te chu sorkar chuan a cancel sak niin a puh. "Delhi pan tumte chuanna tur rel in cancel a, tharum thawh tir tumin in nawr lui a ni. Kei ngei pawh police-te min ven tir a, a hmaa vawi tam tak ka lo sawi tawh angin police venhimna pek hi ka ngai lo", tiin a sawi.

March 23 hi British-in Bhagat Singh, Rajguru leh Sukhdev-te an khaihlumna ni champha a ni a, hei vang hian he ni hi nawrh huaihawt ṭanna ni atan a thlang a ni. Hazare nawrh huaihawtnaa tel tum hi mi tam tak an awm nia sawi a ni.