Sonia Gandhi a dam lo, Shimla aṭangin Delhi-ah hruai

Congress Party president hlui Sonia Gandhi chu Shimla-ah a dam lo a, Ningani zan khan Delhi-ah hruai nghal a ni.

Sonia Gandhi leh a fanu, Priyanka Gandhi Vadra-te chu Ningani khan Shimla aṭanga km 14 vela hla, Chharaba khuah an kal a ni. An nufa hian motorin Chandigarh aṭangin Shimla hi an pan a, Chharaba-a Hotel Wilflower Hal-ah an thleng a ni. Priyanka-i in sak lai endik tura kal a ni.

In sak a enpui hnuah Ningani tlai khan Sonia hi hotel-ah kirin, a dam lo zui ta a ni. Security agency-te chuan Shimla-a Indira Gandhi Medical College hotute an be pawp nghal a, zan dar 11.45 velah ambulance an tir a, mahse Sonia hian Chandigarh pan a duh zawk avangin hemi zan vek hian panpui nghal a ni. Chandigarh aṭang hian special aircraft hmangin Delhi-ah hruai a ni nghal bawk.