Vaccine dose la kim chauh punkhawmnaa kal turin ti

Sorkar laipui chuan ram chhunga hri leng mek avangin mipuite chu punkhawmna hmunte pumpelh hram tura ngenin, loh theih loha an kal dawn a nih pawhin vaccine dose bikima la te chauh kal turin a ti.

"Mipui punkhawmna te hi neih tam loh a ṭha a, a bikin tunhnaia hunpui lo thleng turah hei hi pawimawh zual hle. Ṭul tawpa kan kal dawnte a nih chuan vaccine bikima lak chu thildang kan tih hmaa tihhmasak ṭul a ni. Anih loh chuan mipui tlem thei ang ber kalkhawm a ngai a ni," tiin Indian Council of Medical Research (ICMR) director general Balram Bhargava chuan Ningani khan a sawi.

Sorkar hian hunpui lo thlen hmain natna darh zel thei laka veng turin ramchhunga puitling tam zawkte chu October thla ral hmaa Covid-19 vaccine dose khatna pek kim hman a tum.

August hian thlakhat chhunga nitin chawhruala dose semchhuah zat, monthly average of daily doses chu nuai 59.29-ah a pung chho a, July thlaa nuai 43.41 pekchhuah aiin 36.5% in a sang chho a ni. May thlaa dose nuai 19.9 pekchhuah ai khan 200% in a sang zawk bawk.

August thla chhung hian vaccine hi dose vaibelchhe 18.38 pekchhuah a ni a, July khan dose vaibelchhe 13.45 pekchhuah a ni.

State te zawk leh UT-ah chuan puitling 100% hnenah vaccine dose khatna pek chhuakna leh pek chhuah kim hnaihna a tam tawh. Sikkim, Himachal Pradesh leh Dadar & Nagar Haveli-ah chuan kum 18 chunglam 100%-in dose khatna an la tawh a, Tripura, Ladakh, Daman & Diu, Lakshdweep leh Mizoram chuan 85% an pechhuak tawh tih official te chuan an sawi.

Natna benvawn nei leh hri vanga thihna thleng thei vennan mipuite chu vaccine lak ngai pawimawh turin sorkar chuan a ngen a, vaccine lak zawh hunah pawh mask vuah chhunzawm zel turin a chah.

Ramchhungah kartina hri kai thar zatin tlakhniam lam pan mah se August 31 thleng khan district 39 - a bikin Kerala leh hmarchhak state-te chuan Covid positivity rate 10% chunglam vek an nei a, district 38-ah chuan 5-10% inkar a ni thung.