Teaching leh non-teaching staff 80% in vaccine la tawh

Education Ministry official chuan ram chhungah teaching leh non-teaching staff zinga 80% velin Covid-19 vaccine dose khatna an la tawh tih Ningani khan a sawi.

"Rampum huapa school hawn theihna tur zinga pawimawh tak pakhat chu zirtirtu-ten vaccien an lak ṭhat hi a ni," tiin ministry chuan state sorkarte hmalakna chu uluk takin a enzui zel dawn a ni, a ti.

"State leh UT hnen aṭangin thu lawmawm tak kan dawng a, state tam zawkin zirtirtu vaccine la tawh 80% chuang an nei tawh a ni. Teaching leh non-teaching staff tam zawk chuan Covid-19 vaccine dose kimin emaw, a dose khatna tal emaw an la tawh a ni," tiin senior ministry official chuan a sawi.

Ministry of Education (MoE) chuan Thawhlehni khan state leh Union Territory-a teaching leh non-teaching staff-te chu September thla chhungin vaccine dose khatna la hman vek turin a ngen.

State tin chu kar khatah ṭum hnih zel Google tracker hmangin vaccine an pekchhuah dan kimchang tarlang ṭhin turin a ti bawk.

"Zirtirtu vaibelchhe hnih chuangin vaccine an lak theih nan vaccine sem runpui hi kalpui a ni a, state chhunga vaccine semchhuahte hi Department of School Education and Literacy chuan a thlithlai reng a ni. Hei hi school hawn leh tur chungchanga thutlukna siam turah pawh a pawimawh hle dawn a ni," tiin official chuan a sawi.

Union health minister Mansukh Mandaviya chuan Nilaini khan Covid-19 vaccine dose vaibelchhe hnih chuangchu state hrang hrangah tun thla chhunga semchhuah theih tura buatsaih a ni a, school-a thawk zirtirtute ngaipawimawha Teachers' Day, September 5 hmaa vaccine pe hman vek turin a lo ngen tawh bawk.

Hripui leng vangin ram chhunga school-te chu nikum March thla aṭang khan khar an ni a, sorkar laipui chuan tualchhunga hri leng dinhmun azirin school-te hi a remchan dan anga hawn a lo phalsak tawh a ni. State ṭhenkhat chuan school-te an hawn ṭan hnuah hripui leng thawh hnihna vangin kumin April thla aṭang khan khar leh an ni.

Tunhnai chhoa Covid-19 hri kai an tlakhniam leh tak avangin state ṭhenkhatte chuan school an hawng ṭan leh tawh a, staff leh zirtirtu vaccine dose bikima la lo an la awm hlawm avangin hlauhthawnna erawh a lian hle.