UP sorkarin panchayat inthlanna duty Covid-19 vanga thi chhungte zángnadawmna pe

Uttar Pradesh sorkar chuan April-May-a Panchayat inthlan an neih ṭuma sorkar hnathawk duty zinga Covid-19 vanga thi chhungte hnenah zángnadawmna a pe.

Covid-19 hri leng thawh hnihna thlen laia Panchayat inthlan an neihah duty zingah mi 2,000 chuang chu hri vangin an thi a ni. State sorkar chuan hri vanga thi chhungte hnenah hian Rs nuai 30 ṭheuh a pe dawn a ni. District Magistrate-te chuan TRGS kaltlangin an chhungte bank account-ah pawisa hi an dahsak ang.

State sorkarin a chhinchhiah danin, panchayat inthlan zawh hnuah inthlana duty sorkar hnathawk zinga mi 2,128 an thi a, an zingah 2,097 chu Covid-19 vanga thi niin natna dang vanga thi 31 an awm bawk.

Hripui len laia inthlan neih tur hi sawn turin Allahabad High Court-ah PIL-te thehluh a ni a, mahse court chuan he ngenna hi hnawlin inthlan hi an buatsaih tlang a ni.